شاركها
ياخدمي ياطحلبي ..
يتداول بعض الجماهير كلمات وعبارات عجيبة غريبة زي شاورما ، بروست ، سليق ،طحلب ، خنفسانة ، …..إلخ طيب احنا كلنا بناكل بروست وشاورما وبيك ومعصوب مدري ليش نستقل الأكلات هذي لما لاعبين ياكلوها أو نعيبها..
هذي ياإخوان نعمة كبيرة خاصة إنو كثير بلدان في الأوقات الراهنة مش محصلينها والمفروض نحمد ألله كثير عليها بدل مانستهتر بيها ونخليها ضمن كلام سخيف نتشمت بيه باللاعبين وغيرهم .
وكلمات وعبارات كثيرة مؤلفة من بعض الجماهير السخيفة فتسمع مثلاً وطبعاً أنا هنا أخص ماأعمم مثلا الأهلاوي يقول للإتحادي ياخدمي والاتحادي يقول للأهلاوي ياضفدع أو ياطحلب ومسميات كثيرة جات وراحت وراحت وجات . لكن خلونا شوية نتكلم عن العبارة أو الكلمة اللي يستخدمها المشجع الأهلاوي ضد المشجع الاتحادي وهي كلمة (ياخدمي ) الأهلاوي يقصد إن جماهير الاتحاد خدم يعني المقصود بيها إنهم من ذوات البشرة السوداء أو العبيد وكلنا عبيد ألله وبعدين ( إن أكرمكم عند ألله أتقاكم ) ثم إن هذولا بشر ومسلمين زينا ومن خلائق ألله .
ونفس الموضوع لمن الهلالي يقول على الاتحادي (نيجيريا)قال يعني إن مدرج الجمهور الهلالي ماشاء ألله مافيه ولا خال أو أسمر أو أو أو وكلهم يعني مشجعين عرب من أصول بريطانية أو ألمانية أو سويدية يعني أنا دحين لمن أعير واحد واستهزىء بيه وأقله مثلا يادب طبعا في الحالة دي لازم أكون أنا تلقائيا نحيف أو انسان عادي .
ولمن أقل لواحد حرامي لازم برضه أنا أكون إنسان أمين ومعروف بأمانتي أو أقول لواحد ياقصير من المفترض إني أنا مش قصير على الأقل متوسط الطول وكدة هه ممكن تنبلع . والمشكلة إنو حتى في المدرج المدريدي أو البرشلوني حتلاقي نصهم خيلان وكدا معظم مدرجات الأندية الأوروبية والإمريكيةوالعربية وماسمعنا أحد يقول عنهم خدم .
يعني الخيلان في المدرج الاتحادي ماركة مسجلة ولا لونهم يختلف عن الأسود أو الأسمر ويعني نازلين من المريخ ولا كوكب المشتري (واللي مايشتري يتفرج ) ياناس… شي يجنن صراحة .
انت ياهلالي أو يا أهلاوي أويا اتحادي أو أي مشجع لما تقول على دا ولا دا ياخدمي قبل لا تقول هذي الكلمة طالع في جمهوركم لو لقيته في دي اللحظة كلهم بيض ومافي ولا خال بينهم أو على الأقل موجود بينهم بس 10خيلان من حقك تنطق الكلمة ولا السكوت أفضل . يعني خلوني أقلكم موقف مر علي شخصياً في نفس الموضوع ده .كنت ماشي بحي الروضة بعد وحدة من المباريات النهائية وكان اﻷهلي فاز بالكأس من قدام الإتحاد .
وتعرفوا كيف الجماهير المتعصبة بعد انتهاء كل مباراة( فاينل) المهم لاحظت على ركن جنب قصر كبير شباب شكلهم من حي الروضة وممكن يكون هذا قصرهم واقفين جنبو وباين عليهم ماشاء ألله إنهم من أهل العز والنعمة ومنهم تقريبا 4 أشخاص لونهم أبيض وشعورهم ناعمة وفيهم جمال ووسامة وسنهم مايتجاوز أكبرهم ال16 سنة وأعتقد إنهم من الشباب اللي ممكن أمهاتهم لبنانيات أو سوريات أو من ذا القبيل وكان يبدوا من كلامهم وتصرفاتهم وبالعلم الاتحادي المتلحفين بيه إنهم متعصبين للإتحاد . المهم مرت من جنبهم سيارة فيها 5 شباب من الشباب اللي بشرتهم سوداء غامقة جدا .
وكمان مقاعد السيارة سوداء جدا يعني الخيلان يادوب تشوفهم داخل السيارة هي مش شماتة لكن دا اللي حصل المهم هذولا الشباب السمر معاهم علم أهلاوي كبير ملفين بيه سقف السيارة ويضربوا بواري متعمدين عشان يغيظوا بيها العيال أو الشباب الاتحاديين ( أهل النعمة ) واحد من العيال البيض انقهر وقلهم ياطحالب . الخيلان زعلوا وردوا على البيض وقالولهم: روحوا ياخدم ؟؟؟ زعلوا الأولاد البيض وكانوا يبغوا يشتبكوا معاهم بمضاربة .
أنا رحت للسمر أهدي الوضع وقلتلهم ؛ حصل خير قالوا :شوف يقولوا علينا طحالب قلت لهم : تقوموا تردوا عليهم بكلمة خدم رد علي واحد من الخيلان وقال: أصلهم خدم وأنا في نفسي أقول سبحان الله الدنيا انعكست هذولا فيهم البياض دا كلوا والنعمة والجمال والعز خدم ياجحش أمال انتوا شايفين نفسكم مثلا بياضكم مغطي الدنيا ولا نظركم أنعدم واللي غايظني انو عيال النعمة زعلوا وانفعلوا من كلمة خدم انا حتجنن ياإخوان الناس صار ماعندها نظر وقلت للخال إيش فيها لمن يقلك طحلب أو ضفدع إيش المشكلة يعني انت ضفدع عن جد ولا طحلب عن جد ومن قهري قلت في نفسي (يابالله على الضفضع ).
ولاحظ إنو بعض الناس ما يبغى أحد يغلط على ناديه أو ينقرز عليه . ياجماعة النقرزة والمحشات الظريفة اللطيفة مطلوبة بس بشرط أنها ماتخرج عن النص وتدخل في التجريح والمس بكرامة الإنسان سواء اتحادي أو أهلاوي أو أي مشجع لأن الفكاهة والنقرزة دعابة حلوة وتنمي روح المحبة بين الناس ولاحظ بعض الناس يزعل من رسمة أو مقطع في الواتس عن الأهلي أو الاتحاد أو حتى لو كان عن لاعب معين فتلاقيه يعصب ويزعل من صاحب المقطع ويدافع عن اللاعب والنادي بعصبية وكأن اللاعب هذا بيفيده بحاجة طيبة . طيب ليش أنا أدافع عن دا ولا دا من اللاعبين أو غيرهم ؟
هل أنت مسؤول عنهم ولا بتاخذ مبلغ رمزي من النادي شهريا لهذا الشيء. وبعدين هذا اللاعب تحسب له انتماء لناديه مثلا أنا أقلك أي لاعب مالو انتماء لناديه إلا من رحم ربي والدليل على كدة أن اللاعب فلان لو سجل هدف تلاقيه يجري فرحان وهات يابوس في فنيلة النادي ويغطي بيها وجهه ويرجع يبوس فيها تاني وتالت ياسلام على الإخلاص تقول ميت في الفريق وبعد فترة جاله عرض من نادي منافس وطبعا يقبض المبلغ ولا فكر في النادي الأول ولفحلو كم مليون ولعب للفريق التاني وبعد ما يسجل هدف في الفريق الجديد يجي يجري ويمسك الفنيلة طبعا حق الفريق الجديد وهات يا شفشفة في أمها ياسلام وين البوس حق فنيلة النادي الأول المهم العشق والانتماء طار في الهوى وصار العشق والإنتماء للملايين . طيب ليش أنا كمشجع أضارب وأسخط وأقعد أرد على دا ودا وليش هذا يغلط وليش هذا ما يغلط وأدخل في فلم رياضي هندي . مش أحسن أشجع الكورة الحلوة والنادي الألى من غير تعصب ولا مشاحنات وعشان لا أخسر أي إنسان .
ملاحظة :
ترى الخيلان ياشباب حبايبنا وجيراننا وزملاءنا في الدراسة وفي العمل ولهم منا كل محبة وتقدير واحترام وكمان ما أنسى إنو في بعض من الجماهير أو المنتمين لﻷندية سواء أهلي أو اتحاد أو أو أو … صراحة على مستوى راق من التشجيع واﻹطروحات الرياضية الهادفة وماشاء ألله تلاقيه أرشيف للمعلومات الرياضية الراقية .
وسامحونا على الإطالة
محبكم : فهد حمدان خلاف
أخصائي إجتماعي بمستشفى الملك عبدالعزيز بجدة
تعليق واحد
ابو حمدان ليه ماذكرت نادي النصر في المقاله ولا هو التعصب الاتحادي ??