مي عبدالله – رياضة العرب
بعد خسارة الزمالك المُذلة أمام كابس يونايتد في دوري أبطال أفريقيا، اتصعبت الأمور إلى حد ما على الفريق الأبيض.
اتكلم المستشار مرتضى منصور، رئيس النادي، عن سبب الهزيمة وطريقة تعامل إيناسيو مع اللاعبين، وأكدلنا إنه مبيتدخلش بأي شكل من الأشكال في تشكيل وترتيب أوراق الفريق.
وقال مرتضى منصور إنه لما بيتدخل ويحط التشكيل الفريق بيكسب بطولات زي موسم 2015 – نقلًا عنه في لقاءه مع مراسل برنامج مع شوبير.
ومن هنا، احب اوجه رسالة للمستشار مرتضى منصور سواء عمل بيها أو لا، “خليك انت المدرب”، زي مابتقول إنك لما بتدخل الفريق بيكسب يبقى نوفر الفلوس والمجهود واللقاءات اللي ملهاش حصر ورحلات الطيران ونعين الأستاذ محمد صلاح كصورة بس ينزل في الملعب عشان الهيبة بردك، وانت تبقى حاطط التشكيل وتحرك اللاعيبة زي ماتحب.
مرتضى منصور شخصيته قوية وقيادية ويقدر على اللاعيبة في الملعب ويقدر يحمسهم اكتر من حماس حسام حسن للاعيبة المصري، وفاهم زي ما بيقول في الأمور الكروية يبقى حرام يجيب مدرب ويعشم الجماهير انه كويس وفي الاخر يطلع “إيناسيو”.
وممكن ده يحصل على سبيل التجربة مفهاش حاجة ويكون أول رئيس نادي بيدرب فريقه، وكده كده الزمالك متعود على التجارب مجتش على رئيسكم!
مي عبدالله
كاتبة صحفية وناقدة رياضية
